İngiltərə çempionatında yeni lider

İngiltərə çempionatında mövsümə uğurla başlayan “Tottenhem” 9-cu turda “Fulhem”i qəbul edib.

“Tottenhem Hotspur Stedium”da keçirilən London derbisində hesab 36-cı dəqiqədə açılıb. Son Hön Min “mahmızlar”ı irəli çıxarıb.

Fasiləyə 1-0 hesabı ilə öndə yollanan meydan sahibləri 2-ci yarıda üstünlüyü möhkəmləndiriblər. Bu dəfə Ceyms Meddison fərqlənib. Qalan vaxtda sərfəli nəticəni qoruyan Şimali London təmsilçisi 2-0 hesablı qələbə qazanıb.

9 turdan sonra 23 xalı olan “Tottenhem” yenidən liderliyə yüksəlib. Komanda ən yaxın izləyicisi, son çempion “Mançester Siti”ni 2 xal qabaqlayır.

A Seriyasında yuxarı pillələrdə qərarlaşan “Fiorentina” gözlənilmədən məğlub olub. Autsayderlərdən “Empoli”ni qəbul edən florensiyalılar 0-2 hesabı ilə uduzublar. Qonaqların qolları Françesko Kaputo və Emmanuel Qyasinin aktivindədir.

5 oyundan sonra məğlub olan “Fiorentina” hazırda “Napoli” ilə 4-cü, 5-ci yerləri bölüşdürür. Turnir cədvəlinə 22 xalla “İnter” başçılıq edir.