İngiltərə və Almaniya çempionatlarında maraqlı oyunlar olub

İngiltərə Premyer liqasında 35-ci turun növbəti oyunları olub.

Çempionluq uğrunda mübarizəni davam etdirən “Arsenal” bu dəfə səfərdə “Nyukasl”la üz-üzə gəlib. "Sent-Ceyms Park" stadionunda keçirilən görüşdə ilk hissə Ödeqorun qolu sayəsində topçuların minimal üstünlüyü ilə yekunlaşıb. 71-ci dəqiqədə meydan sahiblərinin heyətində Fabien Şör avtoqol müəllifi olub. Qalan vaxtda başqa qol qeydə alınmayıb və 2-0 hesablı qələbə qazanan “Arsenal” xallarının sayını 81-ə çatdırıb. Komanda lider “Mançester Siti”dən 1 xal geri qalır. 65 xalı olan “Nyukasl” isə 3-cüdür.

“Vest Hem” - “Mançester Yunayted” matçının taleyini 1 top həll edib. Londonun Olimpiya stadionundakı görüşdə Benrahmanın zərbəsindən sonra De Xeanın səhvi “çəkicdöyənlər”ə 3 xal gətirib. Ardıcıl 3 məğlubiyyətdən sonra qalib gələn “Vest Hem” 37 xalla 15-ci yerdədir. 63 xalı olan “Mançester Yunayted” isə 4-cüdür.

Bundesliqada “Bavariya” ilə çempionluq yarışında olan “Borussiya” 31-ci turda “Volfsburq”u darmadağın edib. "Siqnal İduna Park" stadionunda keçirilən qarşılaşmada dortmundlular 6 cavabsız topla qələbə qazanıblar. "Sarı-qaralar"dan Kərim Adeyemi və Cud Bellingem dubl edib. Digər qollar Aller və Malenin aktivindədir. İnamlı qələbədən sonra 64 xalı olan “Borussiya” lider “Bavariya” ilə fərqi minimuma endirib. 46 xalı olan “Volfsburq” isə 7-cidir.