İtaliya və İspaniya çempionatlarında titul uğrunda vacib görüşlər olub

A Seriyasının 14-cü turunda son çempion “Napoli” komandası “İnter”i qəbul edib.

“Dieqo Armando Maradona” stadionunda keçirilən matçda ilk qol 44-cü dəqiqədə vurulub. Hakan Çalhanoğlunun topu sayəsində “neradzurri” ilk hissəni öndə tamamlayıb. 1 saatın tamamında Milan təmsilçisi üstünlüyünü möhkəmləndirib. Nikolo Barella komandasının hücumunu qolla tamamlayıb. 2-0.

Neapollular fərqi azaltmağa çalışsalar da, səyləri nəticə verməyib. Əvəzində 85-ci dəqiqədə Markus Türam 3-cü topu meydan sahiblərinin qapısından keçirib. İnamlı qələbə ilə xallarının sayını 35-ə çatdıran “İnter” çempionata başçılıq edir. 24 xalı olan “Napoli” isə 5-ci yerdədir.

La liqada isə 15-ci turun mərkəzi görüşündə “Barselona” klubu “Atletiko”nu qəbul edib. Gərgin mübarizə ilə diqqət çəkən matçın taleyini 1 qol həll edib. Müqavilə ilə “Atletiko”ya məxsus olan və “blauqrana”da icarə əsasında çıxış edən Joao Felişin zərbəsi dəqiq alınıb. 34 xalı olan “Barselona” əvvəlki kimi 3-cü yerdədir. 3 xal az toplayan “Atletiko” isə 4-cüdür.