Joze Mourinyo Çempionlar Liqasının 6 qat qalibini çalışdıracaq

“Roma” komandasından qovulan Joze Mourinyo tezliklə “Bavariya”nın sükanı arxasına keçə bilər.

Xarici mediada yayılan məlumata görə, Almaniya nəhənginin rəhbərliyi Tomas Tuxelin işindən narazıdır və artıq ona əvəzləyici axtarmağa başlayıb. Son xəbərlərə əsasən, T.Tuxelin istefaya göndəriləcəyi təqdirdə onu məhz J.Mourinyo əvəz edəcək. Hətta Jozenin artıq alman dilini öyrənməyə başladığı bildirilir.

Xatırladaq ki, karyerası ərzində “Çelsi”, “İnter”, “Real Madrid”, “Mançester Yunayted” və “Tottenhem” kimi klubları çalışdıran Joze Mourinyo 2021-ci ildən “Roma”da işləyirdi. Bir müddət əvvəl postundan göndərilən 61 yaşlı mütəxəssis “canavarlar”la 2022-ci ildə Konfrans Liqasının qalibi olmuşdu.

Maraq üçün deyək ki, J.Mourinyonu dəvət etmək istəyən “Bavariya” hazırda Bundesliqada 2-ci yerdədir. 50 xalı olan kollektiv lider “Bayer Leverkuzen”dən 5 xal geri qalır.