Joze Mourinyo Türkiyə nəhəngini çalışdıracaq

Cari mövsümü gümüş medallarla başa vuran və baş məşqçi İsmail Kartalla yollarını ayırmağı planlaşdıran “Fənərbağça” artıq dünyaca məşhur mütəxəssis Joze Mourinyo ilə razılıq əldə edib.

Bu barədə Türkiyə mətbuatında məlumat paylaşılıb. Bildirilib ki, portuqaliyalı çalışdırıcı ilə 2 illik müqavilə imzalanıb.

Xatırladaq ki, daha əvvəl “Beşiktaş”ın da Joze Mourinyo ilə danışıqlar apardığı vurğulanırdı. Lakin 61 yaşlı mütəxəssisin yüksək məvacib tələbi təyinatın reallaşmasına mane olub.

Qeyd edək ki, Joze Mourinyo son olaraq “Roma” klubunu çalışdırıb. Bu ilin yanvarında komandadan ayrılan portuqaliyalının rəhbərliyi ilə “canavarlar” 2022-ci ildə Konfrans Liqasının qalibi olub.

Daha əvvəl isə Joze ölkəsinin “Benfika” və “Portu” klublarında, eləcə də Avropa nəhəngləri “Çelsi”, “İnter”, “Real Madrid”, “Mançester Yunayted” və “Tottenhem”ə rəhbərlik edib. Karyerası ərzində İngiltərə, İspaniya və İtaliya çempionu olan mütəxəssis 2 dəfə UEFA Çempionlar Liqasında qələbə qazanıb.