Kilian Mbappenin “Real Madrid”dəki məvacibi məlumdur
Karyerasını “Real Madrid”də davam etdirməyə qərar verən Kilian Mbappenin burada qazanacağı məbləğ məlum olub.
Xarici mediada yayılan məlumata görə, “Kral klubu” 25 yaşlı forvarda illik 50 milyon avro ödəyəcək. Vergi ödənişlərini nəzərə almasaq, hücumçunun gəliri təqribən 20 milyon avro təşkil edəcək. Bununla da o, “Real”ın heyətində ən çox qazanan futbolçu olacaq. Eyni zamanda “Los Blankos” azad agent kimi keçdiyi üçün oyunçuya əlavə olaraq 100 milyon avro mükafat verəcək.
Maraq üçün deyək ki, PSJ Kilian Mbappeni komandada saxlamaq üçün ona 4 illik sözləşmə çərçivəsində 400 milyon avro təklif etsə də, futbolçu bundan imtina edərək “Real”a keçməyə qərar verib.
Xatırladaq ki, “Monako”nun yetirməsi olan Kilian Mbappe 2017-ci ildən PSJ-də çıxış edir. Bu müddət ərzində 288 matçda 241 qol vuraraq klub tarixinin ən sərrast oyunçusu olan hücumçu Liqa 1-də 5, Fransa Kubokunda 3, Liqa Kubokunda isə 2 dəfə qələbə qazanıb.