Kilian Mbappeyə daha bir fantastik təklif

PSJ-nin ulduz futbolçusu Kilian Mbappeyə fantastik təkliflər gəlməkdə davam edir.

Xarici KİV-də yayılan məlumata görə, fransalı forvard Səudiyyə Ərəbistanının “Əl-Hilal” kollektivinin də maraq dairəsinə düşüb.

Klub 24 yaşlı hücumçuya 2 illik müqavilə və 400 milyon avro məvacib təklif edib. Ərəblər həmçinin PSJ-yə də 200 milyon avro ödəmək niyyətindədirlər.

Eyni zamanda iddia edilir ki, Paris təmsilçisi müqaviləsi 2024-cü ilə qədər olan futbolçunu komandada saxlamaq üçün 1 milyard avro qazana biləcəyi 10 illik müqavilə təklif etməyə hazırlaşır.

Bu klublarla yanaşı, “Real Madrid”in də maraq dairəsində olan K.Mbappe isə təkliflərin heç birini cavablandırmayıb. Lakin bildirilir ki, onun əsas hədəfi “kral klubu”nda çıxış etməkdir.

Xatırladaq ki, 2017-ci ildən PSJ-nin formasını geyinən Kilian 260 matçda 212 qolun müəllifidir. Klub tarixinin ən sərrast oyunçusu olan forvard bu müddət ərzində Fransa çempionatında 5, ölkə kubokunda 3, liqa kuboku və super kubokda isə 2 dəfə qalib gəlib.