Klublararası dünya çempionatında 1/8 final mərhələsinin daha bir oyunu keçirilib

ABŞ-də təşkil olunan klublararası dünya çempionatında 1/8 final mərhələsinin daha bir oyunu keçirilib.

“Mançester Siti” Səudiyyə Ərəbistanının “Əl-Hilal” klubu ilə qarşılaşıb.

Görüşdə sürpriz nəticə qeydə alınıb. Asiya təmsilçisi İngiltərə nəhəngini 4-3 hesabı ilə yenərək 1/4 finala adlayıb.

Oyunun taleyi əlavə vaxtda həll olunub. Oyunda hesabı 10-cu dəqiqədə “şəhərlilər”in yarımmüdafiəçisi Bernardu Silva açıb.

İkinci hissənin startında “Əl-Hilal” Markos Leonardonun qolu ilə hesabı bərabərləşdirib. 52-ci dəqiqədə Malkom ərəbləri hesabda önə çıxarıb. Ancaq cəmi 3 dəqiqə sonra “Mançester Siti”nin norveçli ulduzu Erlinq Holand 55-ci dəqiqədə bərabərliyi təmin edib.

Qarşılaşmanın əsas vaxtı 2-2 hesabı ilə başa çatıb. Əlavə vaxtın əvvəlində “Əl-Hilal” yenidən hesabı xeyrinə dəyişib. Bu dəfə müdafiəçi Kalidou Koulibali fərqlənib. Ancaq 104-cü dəqiqədə Fil Foden “Mançester Siti”nin bərabərlik qolunun müəllifi olub. Ərəbistan klubunun qələbə qolunu isə 112-ci dəqiqədə dubl edən Markos Leonardo vurub.

Beləliklə, “İnter”in ardından daha bir Avropa nəhəngi, Xosep Qvardiolanın baş məşqçisi olduğu “Mançester Siti” mübarizəni dayandırıb. Simeone İnzaqinin çalışdırdığı “Əl-Hilal” 1/4 finalda İtaliya “İnter”ini mübarizədən kənarlaşdıran “Fluminense” ilə qarşılaşacaq.