Koşiki Karate üzrə "Baku Open 2025" beynəlxalq turniri yekunlaşıb

Aprelin 13-də koşiki karate üzrə “Baku Open 2025” beynəlxalq turnirinə yekun vurulub.

Azərbaycan Texniki Universitetinin İdman Sarayında təşkil olunan yarışın final mərhələsinin əvvəlində Dövlət Himni səsləndirilib. Daha sonra turnirdə final görüşlərinə start verilib.

300-dək idmançının qatıldığı mötəbər yarışda Azərbaycan karateçiləri ilə yanaşı, Rusiya, Özbəkistan, Qazaxıstan, Gürcüstan və digər ölkələrin təmsilçiləri mübarizə aparıblar.

Reqlamentə əsasən, “Baku Open 2025” beynəlxalq turnirində finala yüksələn karateçilər dünya çempionatında iştirak etmək hüququna yiyələnirlər.

Ənənəvi olaraq keçirilməsi planlaşdırılan yarışın məqsədlərindən biri də gənclərin idmana və sağlam həyat tərzinə marağını artırmaq, onların asudə vaxtının səmərəli təşkilinə kömək etməkdir.

Qeyd edək ki, “Baku Open 2025” turnirində final görüşləri yekunlaşdıqdan sonra mükafatlandırılma mərasimi təşkil edilib. Yarışda fərqlənən idmançılara diplom və medallar təqdim olunub.