Kriştiano Ronaldo və Lionel Messi Çempionlar Liqası ilə vidalaşdılar

Kriştiano Ronaldonun çıxış etdiyi Səudiyyə Ərəbistanının "Əl-Nəsr" klubu Asiya Çempionlar Liqasının yarımfinalında Yaponiyanın "Kavasaki" klubuna 2-3 hesabı ilə məğlub olub.

Ronaldo bütün matçı meydanda keçirsə də, oyun boyu qol vura bilməyib.

Növbəti mərhələyə adlayan “Kavasaki” finalda Səudiyyə Ərəbistanının digər təmsilçisi “Əl-Əhli” ilə qarşılaşacaq. Görüş mayın 3-də Ciddədə baş tutacaq. “Əl-Nəsr” isə mübarizəsini Səudiyyə Pro Liqasında davam etdirəcək.

İdman dünyasında Ronaldonun əzəli rəqibi sayılan argentinalı ulduz Lionel Messinin çıxış etdiyi "İnter Mayami" də Şimali, Mərkəzi Amerika və Karib hövzəsi Çempionlar Kubokunda finala yüksələ bilməyib.

ABŞ təmsilçisi yarımfinal mərhələsinin cavab matçında Kanadanın "Vankuver Uaytkeps" klubu ilə üz-üzə gəlib. Qarşılaşma "İnter Mayami"nin məğlubiyyəti ilə bitib: 1-3. Komanda ilk görüşdə də rəqibinə 0-2 hesabı ilə məğlub olmuşdu.

Qeyd edək ki, mayın 2-də digər yarımfinal oyununda Meksikanın "Krus Asul" və "Uanl Tiqres" klubları üz-üzə gələcək. İlk matç heç-heçə yekunlaşıb: 1-1.