Kriştiano Ronaldodan yeni rekord: 850-ci qoluna imza atdı

Dünya futbolunun əsas ulduzlarından olan Kriştiano Ronaldo daha bir uğura imza atıb.

Belə ki, portuqaliyalı superulduz sentyabrın 2-si “Əl-Həzm”ə 5:1 hesabı ilə qalib gəldikləri matçda karyerasının 850-ci qolunu vurub. Təcrübəli oyunçu görüşün 68-ci dəqiqəsində fərqlənməyi bacarıb. Bu nəticə ilə Ronaldo rəsmi oyunlarda vurulan qolların sayına görə rekordçudur.

Siyahıda 2-ci yeri 818 qolla “İnter Mayami”nin argentinalı hücumçusu Lionel Messi tutur.

Qeyd edək ki, daha əvvəl Səudiyyə Ərəbistanı çempionatının 4-cü tur “Əl-Şabab”la matçında dubl edən və milli çempionatlarda 517-ci qoluna imza atan Ronaldo ölkə çempionatlarında da ən çox fərqlənən futbolçu adına yiyələnib.

Xatırladaq ki, Kriştiano 2022-ci ilin dekabrından “Əl-Nəsr”də çıxış edir. Bu müddət ərzində 30 oyunda forma geyinən 38 yaşlı forvard 26 qolla yadda qalıb. Bir müddət əvvəl isə Kriştiano komandası ilə Ərəb Klublarının Çempionlar Kubokunda qələbə qazanıb.