Lionel Messi Barselonaya gedib

PSJ-nin superulduzu Lionel Messinin “Barselona”ya qayıtması yenidən dünya gündəmindədir.

Belə ki, 35 yaşlı forvardın Barselona şəhərinə getməsi onun “blauqrana”ya keçidi ilə bağlı xəbərlərin artmasına səbəb olub. Ancaq sonradan sosial şəbəkələrdə yayılan şəkillər Messinin Barselonaya nə üçün getdiyinə aydınlıq gətirib.

Liqa 1-in son turunda PSJ-nin qələbə qolunu vuran Leo burada keçmiş komanda yoldaşları Serji Buskets və Jordi Alba ilə görüşüb. Onlar xanımları ilə birlikdə şəhər gəzintisinə çıxıblar.

Qeyd edək ki, son vaxtlar Messinin atası Xorxenin “Barselona” klubunun prezidenti Joan Laporta ilə danışıqlar apardığı barədə xəbərlər paylaşılır. Veteran oyunçunun PSJ ilə müqaviləsini uzatmaqdan imtina etməsi isə onun “blauqrana”ya qayıdacağı ilə bağlı xəbərlərin daha da yayılmasına səbəb olub. Lakin futbolçuya yaxın olan şəxslər Leonun Devid Bekhemin sahibi olduğu “İnter Mayami”yə keçmək istədiyini bildirirlər.