Lionel Messidən gözlənilməz qərar

Dünya futbolunun ulduzu Lionel Messi gələcək karyerası ilə bağlı açıqlama verib.

Hazırda davam edən Amerika Kubokunda Argentina millisinin heyətində olan Leo bu yarışa sonuncu dəfə qatıldığını bildirib.

Jurnalistlərin 2026-cı il dünya çempionatı ilə bağlı sualına cavab olaraq isə hücumçu hələ dəqiq qərar vermədiyini deyib.

Qeyd edək ki, Messinin şərəfini qoruduğu Argentina seçməsi Amerika Kuboku yarışında finala qədər irəliləyib. Yarışın son qalibi olan “albiseleste” iyulun 15-i keçiriləcək həlledici qarşılaşmada Kolumbiya yığması ilə üz-üzə gələcək.

Xatırladaq ki, ötən yay PSJ ilə müqaviləsini uzatmayan Leo azad agent kimi “İnter Mayami” klubuna qoşulub. MLS komandası ilə sözləşməsi 2025-ci ilin dekabrınadək olan 37 yaşlı forvard 29 matçda 25 qol və 15 asistlə yadda qalıb. Bundan başqa, o, “İnter Mayami” ilə Liqa Kuboku yarışında qələbə qazanıb.