“Mançester Siti” kubok matçında rəqibinə rəhm etmədi

İngiltərə kubokunun 1/8 finalında yarışın favoritlərindən “Mançester Siti” səfərdə “Bristol Siti” ilə üz-üzə gəlib. İlk hissə Fodenin qolu sayəsində qonaqların minimal üstünlüyü ilə yekunlaşıb. Fasilədən sonra hücumlarını bir qədər də sürətləndirən mankunianlar daha 2 dəfə fərqlənib. Dubl edən Fodenlə yanaşı, De Brüyne qapını dəqiq nişan alıb. Beləliklə, 3-0 hesablı qələbə qazanan “Mançester” komandası 1/4 finala adlayıb.

Digər oyunda Premyer liqanın 2 təmsilçisi – “Fulhem” və “Lids” qarşılaşıb. Fasiləyə Palyinyanın qolu sayəsində öndə yollanan meydan sahibləri, 2-ci yarıda fərqi artırıblar. Bu dəfə Solomonun zərbəsi dəqiq olub. Matç London təmsilçisinin 2-0 hesablı qalibiyyəti ilə yekunlaşıb.

A Seriyasında 24-cü turun bağlanış oyunu Turin derbisi ilə əlamətdar olub. “Yuventus” və “Torino” arasında prinsipial matçda 6 qol qeydə alınıb. İlk yarı meydan sahiblərindən Kuadrado və Danilo, qonaqlardan isə Karamo və Sanabriyanın qolları sayəsində 2-2 hesabı ilə yekunlaşıb.

Fasilədən sonra isə “Qoca Sinyora” daha 2 qol vurub. Bu dəfə Bremer və Rabyo fərqlənib. “Yuventus” - “Torino”: 4-2. Əzmkar qələbədən sonra 35 xalı olan “Yuve” 7-ci yerdədir. 3 görüşdür qalibiyyətə həsrət olan “Torino” isə 31 xalla 9-cudur.