“Mançester Siti”nin futbolçusu üçün 117 milyon avroluq təklif

“Mançester Siti” əsas ulduzlarından Kevin de Brüyneni itirə bilər.

İngiltərə mətbuatında yayılan məlumata görə, 32 yaşlı yarımmüdafiəçi Səudiyyə Ərəbistanı klublarından birinin əsas hədəfidir.

Bildirilir ki, hələlik adı açıqlanmayan kollektiv Kevin üçün ümumilikdə 117 milyon avro ödəməyə hazırdır. Lakin “şəhərlilər” müqaviləsi 2025-ci ilə qədər olan Kevinlə vidalaşmaq niyyətində deyil.

Mankunianlar dəyəri təqribən 60 milyon avro olan De Brüyneyə yeni sözləşmə təklif etməyi planlaşdırır.

Qeyd edək ki, 2015-ci ildən “Siti”nin formasını geyinən Kevin de Brüyne bu müddət ərzində 377 matça çıxıb. Təcrübəli yarımmüdafiəçi bu oyunlarda 102 qol və 168 assistlə yadda qalıb. Mançester təmsilçisi ilə 5 dəfə Premyer Liqanın qalibi olan futbolçu Çempionlar Liqası, İngiltərə kuboku və Superkubokunda qələbə qazanıb. 2010-cu ildən Belçika millisinə də çağırılan Kevin 99 görüşdə 26 qol vurub.