“Milan” A Seriyasının yeni mövsümündə ilk görüşünə çıxıb

İngiltərə çempionatında qələbəyə iddialı “Arsenal” 2-ci turda “Kristal Pelas” kollektivinin qonağı olub.

“Selherst Park” stadionunda baş tutan görüşdə ilk hissə qolsuz yekunlaşıb. 53-cü dəqiqədə “topçular” penalti vurmaq imkanı qazanıblar. 11 metrlik zərbəni Martin Ödeqor dəqiq yerinə yetirib.

67-ci dəqiqədə Tomiyasunun 2-ci sarı vərəqə almasından sonra “Arsenal” azlıqda qalsa da, “Pelas” dönüş edə bilməyib. Minimal hesablı qələbəyə sevinən “Arsenal” 6 xal toplayaraq “Brayton” və “Mançester Siti” ilə birlikdə 1-ci, 3-cü yerləri bölüşdürür.

“Milan” A Seriyasında yeni mövsümə qalibiyyətlə start verib. Bolonya səfərinə yollanan “rossoneri” 2 cavabsız qolla güclü olub. Komandanın heyətində Jiru və yeni transfer Pulişiç fərqlənib.

Gecənin maraqlı görüşlərindən biri La liqada “Alaves” və “Sevilya” arasında olub. 7 qolun vurulduğu matçda “Alaves” 4-3 hesablı qələbə qazanıb. İlk turda “Valensiya”ya uduzan “Sevilya” hazırda autsayderlər zonasındadır. “Alaves” isə 3 xalla 8-cidir.