Millətlər liqası : Niderland - Xorvatiya matçı

UEFA Millətlər liqasında ilk finalçı müəyyənləşib. Yarımfinalın 1-ci görüşündə “Niderland” və “Xorvatiya” yığmaları üz-üzə gəliblər.

Rotterdam şəhərinin “De Kip” arenasında keçirilən matçın əsas vaxtında 4 qol vurulub. İlk hissə Doniyel Malenin topu sayəsində “narıncılar”ın xeyirinə yekunlaşıb. 55-ci dəqiqədə Andrey Kramariç hesabı bərabərləşdirib: 1-1.

Bir qədər sonra Xorvatiya seçməsi irəli keçib. Mario Paşaliç qapını dəqiq nişan alıb. Əsas vaxta artırılan 6-cı dəqiqədə meydan sahibləri Noa Lanqın topu ilə tarazlığı bərpa ediblər: 2-2.

Əlavə 30 dəqiqədə isə Xorvatiya futbolçuları daha 2 qol vuraraq qələbə qazanıblar. Əvvəlcə Bruno Petkoviç Modriçin ötürməsindən sonra hesabı 3-2 edib. Bir qədər sonra isə Luka özü də fərqlənib. “Niderland” – “Xorvatiya”: 2-4.

Millətlər liqasının finalına adlayan Xorvatiya komandası həlledici oyunda İspaniya – İtaliya cütünün qalibi ilə qarşılaşacaq.