Milli komandamız Slovakiya yığmasının qonağı olub

Futbol üzrə yığma komandamız Millətlər liqasında 2-ci matçına çıxıb.

C liqasının 1-ci qrupunda yer alan seçməmiz Slovakiya kollektivinin qonağı olub.

Koşitse Şəhər Stadionunda keçirilən qarşılaşmada hesab 22-ci dəqiqədə açılıb. Ondrey Duda meydan sahiblərini irəli çıxarıb. Cəmi 4 dəqiqə sonra fərq 2-yə yüksəlib. Bu dəfə David Strelets topu qapıya göndərib. İlk hissə 2-0 hesabı ilə bitib.

2-ci yarıda komandamız məğlubiyyətdən qurtulmağa çalışsa da, oyunçularımızın səyləri nəticə verməyib. Beləliklə, millimiz portuqaliyalı baş məşqçi Fernandu Santuşun rəhbərliyi ilə 2-ci matçında da məğlub olub. Daha əvvəl isə yığmamız Millətlər liqasının 1-ci turunda Bakıda İsveç kollektivinə 1-3 hesabı ilə uduzub.

Qeyd edək ki, seçməmiz bu yarışda növbəti görüşünü oktyabrın 11-i keçirəcək. Futbolçularımız Tallin şəhərində təşkil olunacaq qarşılaşmada Estoniya komandasının qonağı olacaqlar.