Millimiz Slovakiya yığması ilə üz-üzə gəlib

Azərbaycan yığması UEFA Millətlər liqasında 4-cü matçını keçirib.

Komandamız C liqasının 1-ci qrupu çərçivəsində Slovakiya seçməsini qəbul edib.

Tofiq Bəhramov adına Respublika Stadionunda keçirilən qarşılaşmada azarkeşlər 4 qol görüblər.

Matçın 15-ci dəqiqəsində komandamızın heyətindən Rahil Məmmədov avtoqol müəllifi olub. Lakin 38-ci dəqiqədə tarazlıq bərpa olunub. Toral Bayramov rəqibin qapısını dəqiq nişan alıb. İlk hissə 1-1 hesablı bərabərliklə bitib.

İkinci yarıda seçməmiz azlıqda qalıb. 70-ci dəqiqədə Mahir Emreli ikinci sarı vərəqəni alaraq meydandan qovulub. Cəmi 5 dəqiqə sonra slovakiyalılar 2-ci topu yığmamızın qapısına göndərib. Lukaş Haraslin hədəfi dəqiq nişan alıb. Oyunda son nöqtəni David Duriş qoyub. Azərbaycan – Slovakiya: 1-3.

Qeyd edək ki, Azərbaycan millisi əvvəlki 3 qarşılaşmada Estoniya və Slovakiyaya 1-3, İsveçə isə 0-2 hesabı ilə məğlub olub. Bu nəticələrdən sonra aktivində xal olmayan yığmamız qrup sonuncusudur. 10 xalı olan İsveç və Slovakiya 1-ci, 2-ci yerləri bölüşdürür. Estoniya isə 3-xalla 3-cü yerdədir.