Millimizin üzvü Mahir Emreli karyerasını Asiyada davam etdirəcək

“Nürnberq”də çıxış edən millimizin üzvü Mahir Emreli karyerasını Asiyada davam etdirəcək.

Müvafiq məlumat Almaniyanın məşhur “Bild” nəşrində yerləşdirilib.

M.Emrelinin hansı kluba keçəcəyi yazılmasa da, onun Cənubi Koreyaya yollanacağı iddia olunur.

Məlumatda Mahirin “Nürnberq”in son məşqlərinə qatılmadığı və baş məşqçi Miroslav Klozenin onu komandada saxlamaq istəyinə baxmayaraq, ayrılmaqda israr etdiyi vurğulanır.

Xatırladaq ki, ötən yay azad agent kimi Almaniya təmsilçisinə qoşulan M.Emreli bütün turnirlərdə 15 matçda iştirak edib. Bu oyunlarda 4 qol vuran hücumçu həm də 1 assistlə yadda qalıb.

“Nürnberq”lə müqaviləsi bu yayadək olan Mahir daha əvvəl ölkəmizin “Qarabağ”, Polşanın “Legiya”, Xorvatiyanın “Dinamo Zaqreb”, eləcə də Türkiyənin “Konyaspor” klublarında top qovub. Dünyaca məşhur “transfermarkt” portalı M.Emrelini 800 min avro məbləğində dəyərləndirir.