Millimizin üzvü Ramil Şeydayev Kriştiano Ronaldonu geridə qoyub

“Qarabağ”ın üzvü Ramil Şeydayev 2022-ci il ərzində ən çox qol vuran oyunçular arasında yer alıb.

Beynəlxalq Futbol Tarixi və Statistikaları Federasiyasının tərtib etdiyi siyahıya əsasən, Ramil 25 qolla 55-ci pillədə qərarlaşıb. 26 yaşlı hücumçu bu qollardan 18-ni Premyer Liqada, 4-nü ölkə kubokunda, 1-ni avrokuboklarda, 2-ni isə millinin heyətində vurub. Bu nəticə ilə azərbaycanlı forvard Son Hön Min, Mislav Orsiç kimi məşhur hücumçularla eyni sıradadır.

Qeyd edək ki, ümumən 67 futbolçunun olduğu cədvələ PSJ-nin hücumçusu Kilian Mbappe başçılıq edir. 24 yaşlı fransalı forvard 56 dəfə rəqib qapılarına yol tapıb. Mbappe ən yaxın izləyiciləri Erlinq Holand və Berqsonu 10 qol qabaqlayır.

Maraq üçün deyək ki, Qətərdəki mundialın qalibi, Argentina millisinin kapitanı Lionel Messi 35 qolla 11-ci pillədədir. “Qızıl top”un sahibi, “Real”ın kapitanı Kərim Benzema isə 33 topla 16-cı yerdədir.