Minifutbol üzrə dünya çempionatı ərəfəsində komandaların üzvləri turnirlə bağlı fikirlərini bölüşüb

21 may tarixindən Azərbaycanın paytaxtı Bakıda keçirilən minifutbol üzrə dünya çempionatı ərəfəsində turnirdə iştirak edən komandaların üzvləri mötəbər turnirlə bağlı fikirlərini Baku TV ilə bölüşüblər.

Təşkilatçılığı yüksək dəyərləndirən əcnəbi idmançılar və milli komandaların heyət üzvləri təşəbbüsün yüksək səviyyədə olduğunu vurğulayıblar.

“Təşkilatda əməyi keçən hər kəsə çox təşəkkür edirəm. Hər şey mükəmməldir”, ‒ deyə türkiyəli futbolçu Eriş Erdem bildirib.

Azərbaycana ilk dəfə səfər etdiyini deyən ingilis futbolçu Bham Mussa Bakıya yenidən gələcəyini söyləyib:

“Bu mənim Azərbaycana ilk səfərimdir. Adətən getdiyim ölkələrdə gəzməyi çox sevirəm. Təəssüf ki, hələlik sıx qrafikimiz Bakını gəzməyə imkan vermir. İstər məskunlaşdığımız mehmanxanada, istər məşq zamanı, istərsə də oyun zamanı özümüzə və heyətimizin digər üzvlərinə qarşı yalnız xoş münasibət görürəm. Bir gün mütləq ailəmlə birlikdə Bakıya istirahətə gələcəyəm”.

Qeyd edək ki, sözügedən turnirin qrup mərhələsinə bu gün yekun vurulacaq. Minifutbol üzrə dünya çempionatı iyunun 1-nə qədər davam edəcək.