Minifutbol üzrə “Vur Cup 2” yarışının qalibləri məlumdur

Sağlam həyat tərzinin təbliğinə və pis vərdişlərlə mübarizəyə həsr olunan “Vur Cup 2” minifutbol turnirinə yekun vurulub.

Aprelin 6-da start götürən yarışın yaradıcısı gənc futbolsevər, sahibkar Altay Adıgözəlov-Mustafayevdir.

Nərgiz Mustafayevanın və Elxan Mahmudovun simasında CİS şirkətinin təşkilatçılığı, eləcə də AMF və AFFA-nın dəstəyi ilə keçirilən turnirdə yeniyetmə məktəblilərdən ibarət U-17 liqasında 16 komanda, gənclərdən ibarət U-19 liqasında isə 16 kollektiv mübarizə aparıb.

17 yaşadək futbolçuların yarışında “Sixers” komandasının qalibiyyətindən sonra U-19 liqasında da çempion müəyyənləşib. Bu liqanın final görüşündə “Elitar” və “Mathyoucan Tigers” kollektivləri üz-üzə gəliblər. Qarşılaşma “Elitar” komandasının 6-4 hesablı qələbəsi ilə başa çatıb.

Qaliblərə kubok və medallar təqdim olunub. Bundan başqa, onlar turnirin baş sponsoru MathYouCan, baş tərəfdaş VMF şirkəti, eləcə də sponsorlar – Gavalı və CİS şirkətləri tərəfindən mükafatlandırılıblar.

Qeyd edək ki, “Vur Cup” yarışının media tərəfdaşları “Baku TV”, ASAN Radio və “Offisideplus” idman saytıdır. Texniki dəstək isə “AllStar” şirkəti tərəfindən təmin edilib.