Nazim Sadıxov UFC-dəki ilk döyüşündə rəqibinin qaşını partlatdı

Azərbaycanlı MMA döyüşçüsü Nazim Sadıxov UFC-də debüt görüşünə çıxıb.

O, “UFC Fight Night 219” turniri çərçivəsində amerikalı Evan Elderlə üz-üzə gəlib. 3 raund davam edən görüş gərginliyi ilə diqqət çəkib. Lakin yekunda həmyerlimiz qalib gəlməyi bacarıb.

Belə ki, 3-cü raundda Nazimin qüvvətli zərbəsindən sonra Elderin qaşı partlayıb. Həkimlərin müdaxiləsindən sonra isə qarşılaşmanın dayandırılması barədə qərar qəbul edilib. Belə olan halda N.Sadıxov görüşün qalibi elan olunub. Bununla da, Nazim UFC-dəki karyerasına qələbə ilə start verib.

Qeyd edək ki, N.Sadıxov MMA karyerası ərzində 9 görüşdə qüvvəsini sınayıb və 8 dəfə qalib gəlib. Qələbələrindən 5-ni nokautla əldə edən azərbaycanlı döyüşçü cəmi 1 dəfə məğlub olub.