“Neftçi” 2-ci turda da xal qazana bilməyib

Azərbaycan Premyer liqasında 2-ci turun növbəti matçı “Neftçi” və “Səbail” klubları arasında olub.

“Neftçi Arena”da keçirilən görüşün favoriti meydan sahibləri olsa da, hesabı qonaqlar açıblar. 34-cü dəqiqədə Pedru Nunu “dənizçilər”i irəli çıxarıb. İlk hissə “Səbail”in minimal üstünlüyü ilə yekunlaşıb.

2-ci yarıda təzyiqi artıran “Neftçi” 82-ci dəqiqədə tarazlığı bərpa edib. Kenni Sayef 11 metrlik cərimə zərbəsindən fərqlənib. Qalan vaxtda başqa qol olmayıb. “Neftçi” – “Səbail”: 1-1.

Xatırladaq ki, “ağ-qaralar” ilk turda səfərdə “Kəpəz”ə, “Səbail” isə öz meydanında “Sumqayıt”a məğlub olmuşdu. Belə olan halda 2 turdan sonra hərəyə 1 xal toplayan “Neftçi” və “Səbail” hazırda 8-ci, 9-cu yerləri bölüşdürürlər.