“Neftçi” ardıcıl 3-cü qələbəsini qazandı

11 fevral 2025 233 baxış

“Neftçi” komandası bütün yarışlarda ardıcıl 3-cü qələbəsini qazanıb.

Daha əvvəl Premyer liqada “Şamaxı”, kubokda isə “Kəpəz”i məğlub edən “ağ-qaralar” bu dəfə “Zirə”nin qonağı olub.

Zirə İdman Kompleksinin stadionunda keçirilən 22-ci turun matçında fasiləyədək hesab açılmayıb. 2-ci yarıda isə azarkeşlər 3 qol görüblər.

88-ci dəqiqədə Emin Mahmudov “qartallar”ın qapısına yol tapsa da, əsas vaxta artırılan 1-ci dəqiqədə Ruan Renato tarazlığı bərpa edib: 1-1. Lakin az sonra “Neftçi” qələbə qolunu vurmağı bacarıb. Ervin Koffinin topu sayəsində baş məşqçi Samir Abasovun komandası 2-1 hesabı ilə qalib gəlib.

Bu nəticədən sonra çempionatda xallarının sayını 24-ə çatdıran “Neftçi” “Sumqayıt”ı qabaqlayaraq 6-cı pilləyə qalxıb. Ardıcıl 4 qalibiyyətdən sonra uduzan “Zirə” isə 39 xalla 3-cüdür.

Qeyd edək ki, “Neftçi” növbəti turda “Qarabağ”la üz-üzə gələcək. Fevralın 16-sı “ağ-qaralar”ın meydanında keçiriləcək oyun saat 19:00-da başlayacaq.

#Neftçi FK