“Neftçi” Azərbaycan çempionatının yeni mövsümündə ilk qələbəsini qazanıb

“Neftçi” ölkə çempionatının yeni mövsümündə ilk qələbəsini qazanıb. “Ağ-qaralar” 4-cü turda “Qəbələ” kollektivini qəbul ediblər.

“Neftçi Arena”da keçirilən görüşdə hesab ilk hissəyə artırılan dəqiqələrdə açılıb. Rəhman Hacıyev “flaqman”a üstünlük qazandırıb.

70-ci dəqiqədə meydan sahibləri azlıqda qalıblar. “Neftçi”nin qapıçısı Rza Cəfərov birbaşa qırmızı vərəqə ilə cəzalandırılıb. Bundan sonra “Qəbələ” təzyiqi artırsa da, qonaqların hücumları nəticə verməyib. Əvəzində 80-ci dəqiqədə paytaxt təmsilçisi fərqi 2-yə yüksəldib. Yuri Matias qarşılaşmada son nöqtəni qoyub. “Neftçi” – “Qəbələ”: 2-0.

Cari çempionatda ilk qələbəsini qazanan “ağ-qaralar” 5 xalla 5-ci, 4 matçın hamsında uduzan “Qəbələ” isə sonuncu yerdədir.

Turun digər oyunu gözlənilməz nəticə ilə diqqət çəkib. Avropa liqasında uğurla çıxış edən “Qarabağ” öz meydanında “Kəpəz”lə bacarmayıb.

9-cu dəqiqədə Juninyo “köhlən atlar”ı irəli çıxarsa da, Gəncə komandası Cavad Kərimovun qolu ilə məğlubiyyətdən qurtula bilib. 1-1 hesabı ilə başa çatan görüşdən sonra 7 xalla 3-cü yerdə olan Ağdam təmsilçisi lider “Zirə”dən 5 xal geri qalır. Aktivində 4 xal olan “Kəpəz” isə 9-cudur.