“Neftçi” basketbol üzrə ölkə kubokunda yarımfinala yüksəlib

Basketbol üzrə Azərbaycan Kubokunun A qrupunda son matçlar keçirilib.

"Sərhədçi" İdman Mərkəzində baş tutan oyunda "Neftçi" komandası liqanın lideri "Xəzri" ilə üz-üzə gəlib.

İlk hissə “Xəzri”nin 18-17 hesablı üstünlüyü ilə bitsə də, “ağ-qaralar” sonrakı periodlarda gedişatı dəyişə biliblər. Tədricən təşəbbüsə yiyələnən “Neftçi” yekunda 80-67 hesablı qələbə qazanıb.

Komandanın uğurunda 26 xal və 4 ribaundla yadda qalan Kamran Məmmədov əsas pay sahibi olub. Bu nəticədən sonra “Neftçi” A qrupunu lider kimi tamamlayaraq yarımfinala yüksəlib.

Qeyd edək ki, “Neftçi” komandası Basketbol liqasında da uğurla çıxış edir. 15 turdan sonra 26 xal toplayan “ağ-qaralar” lider “Xəzri”dən 2 xal geri qalaraq 3-cü pillədə qərarlaşıb.