“Neftçi” Premyer Liqada 19-cu turun oyununa çıxıb

“Neftçi” komandası qış fasiləsindən sonra ilk rəsmi matça çıxıb.

“Ağ-qaralar” Premyer liqanın 19-cu turunda “Sabah” kollektivini qəbul edib.

“Neftçi Arena”da baş tutan oyunda 2 qol qeydə alınıb. Görüşün ilk hissəsində qapılar önündə təhlükəli vəziyyətlər yaransa da, hesab açılmayıb.

Matçda ilk qol 77-ci dəqiqədə vurulub. Meydan sahiblərinin üzvü Azər Salahlı topu komandasının qapısına göndərib.

Avtoqoldan sonra fəallaşan “Neftçi” cəmi 2 dəqiqə sonra tarazlığı bərpa edib. Andrey Ştohrin fərqlənib. Qalan vaxtda tərəflərin səylərinə baxmayaraq, başqa qol olmayıb.

Bu nəticədən sonra xallarının sayını 18-ə çatdıran “ağ-qaralar” yarış cədvəlində 7-ci yerdədir. 27 xal toplayan “bayquşlar” isə 5-cidir.

Qeyd edək ki, “Neftçi” növbəti turda “Araz-Naxçıvan”ın qonağı olacaq. Yanvarın 26-sı keçiriləcək görüş saat 16:00-da başlayacaq.