Neymar növbəti qalmaqalla gündəmə gəldi

Adı daim müxtəlif qalmaqallarda hallanan Neymar yenidən gündəmə gəlib.

Braziliyalı ulduz Rio-de-Janeyro şəhəri yaxınlığında yerləşən malikanəsində süni göl və üzgüçülük sahəsi yaradıb. Bununla əlaqədar futbolçunun malikanəsinə gələn ekoloji xidmət nümayəndələri müvafiq yoxlamalar aparıblar.

Araşdırma zamanı məlum olub ki, gölün yaradılması zamanı torpaq və bitki örtüyünə ciddi ziyan dəyib. Nəticədə Neymar şəhər rəhbərliyi tərəfindən 3,3 milyon dollar məbləğində cərimələnib.

Bundan başqa, sözügedən üzgüçülük zonasından və göldən istifadəyə də qadağa qoyulub. Ancaq 31 yaşlı oyunçu qadağalara məhəl qoymaraq orada şənlik təşkil etməklə yanaşı, həm də göldə çimib.

Bununla əlaqədar görüntülər sosial şəbəkələrdə yayıldıqdan sonra məsələ yenidən araşdırılmağa başlanıb.