“Nyukasl” klubunun 21 illik həsrəti sona çatdı

İngiltərə çempionatında 37-ci tura “Nyukasl” – “Lester” görüşü ilə yekun vurulub.

“Sent-Ceyms Park” arenasındakı matçda yerli komanda ardıcıl təhlükəli vəziyyətlər yaratsa da, qarşılaşma qolsuz bərabərliklə başa çatıb. Bu nəticədən sonra 70 xalla 3-cü yerdə olan “Nyukasl” növbəti mövsüm Çempionlar liqasında iştirak etmək hüququ qazanıb.

İtaliya A Seriyasında 36-cı turun son görüşləri olub. Avropa liqasında finala adlayan “Roma” “Olimpiko” arenasında “Salernitana”nı qəbul edib. 4 qolun vurulduğu matçda qonaqlardan Kandreva və Dianın toplarına meydan sahibləri El Şaravi və Matiçin dəqiq zərbələri ilə cavab veriblər. “Roma” – “Salernitana” : 2-2

Çempionatda 6 oyundur qalib gəlməyən “canavarlar” hazırda 60 xalla 6-cı yerdədir. 39 xalı olan Salerno təmsilçisi isə 15-cidir.