“Paris-2024” Olimpiya Oyunlarında qalmaqal yaşanıb

“Paris-2024” Olimpiadasında Argentina və Mərakeş seçmələri arasında futbol qarşılaşması qalmaqalla bitib.

Belə ki, matçın sonlarında hesab 2-1 Mərakeş komandasının xeyrinə olarkən, “albiseleste”nin üzvü Kristian Medina əsas vaxta artırılan 16-cı dəqiqədə tarazlığı bərpa edib.

Bundan sonra mərakeşli fanatlar argentinalı futbolçulara yad əşyalar atmağa başlayıblar. Bəzi azarkeşlər isə meydana qaçaraq görüşün davam etdirilməsinə mane olublar.

Nəticədə baş hakim Qlenn Nüberq oyunçuları soyunub-geyinmə otağına yollayıb. Təqribən 2 saat davam edən fasilə ərzində fanatlar tribunalardan kənarlaşdırılıblar.

Kollektivlərin meydana qayıtmasına icazə verildikdən sonra referi Kristian Medinanın qol epizodunu VAR sistemi ilə izləyib. Yekunda Nüberq ofsaydı qeydə alaraq tərəflərin daha 3 dəqiqə oynamasına şərait yaradıb. Burada başqa qol olmadığından Mərakeş yığması görüşdən 2-1 hesablı qələbə ilə ayrılıb.

Qeyd edək ki, matç yekunlaşdıqdan sonra Argentina Futbol Federasiyası FIFA-ya şikayət ünvanlayıb. Qurum komandaların təhlükəsizliyi üçün lazımi tədbirlərin görülməsini tələb edib.