Portuqaliyalı futbolçu Kriştiano Ronaldo növbəti dəfə tarix yazıb

Portuqaliyalı ulduz Kriştiano Ronaldo futbol tarixində 900 qol göstəricisinə çatan ilk futbolçu olub.

39 yaşlı hücumçu bu uğura yığmasının Xorvatiya komandasına 2-1 hesabı ilə qalib gəldiyi Millətlər liqasının görüşündə imza atıb.

Oyuna start 11-likdə başlayan Kriştiano 34-cü dəqiqədə fərqlənərək Portuqaliya seçməsinin forması ilə 213-cü matçında 131-ci qolunu vurub.

Qeyd edək ki, karyerası ərzində ümumən 900 topun müəllifi olan Ronaldonun əsas bombardirlik uğurları Madrid “Real”ı ilə bağlıdır. “Kral klubu”nun tarixində ən sərrast futbolçu olan Kriştiano “los blankos”un heyətində 438 matçda 450 dəfə rəqib qapılarına yol tapıb. Yetirməsi olduğu Lissabon “Sportinq”ində 5 qol vuran futbolçu “Mançester Yunayted”də 145, “Yuventus”da 101, hazırda çıxış etdiyi “Əl-Nəsr”də isə 68 qolun müəllifidir.