Premyer liqada çempionluq uğrunda vacib görüş keçirildi

İngiltərə Premyer liqasının 33-cü turu çempionluq görüşü kimi göstərilən matçla əlamətdar olub.

Titulun son sahibi “Mançester Siti” yarış cədvəlinin lideri “Arsenal”ı qəbul edib. “Etihad” stadionunda keçirilən qarşılaşmada hesabı 7-ci dəqiqədə Kevin De Brüyne açıb. Hücumlarına ara verməyən “şəhərlilər” 46-cı dəqiqədə fərqi artırıblar. Bu dəfə Con Stounz qapını dəqiq nişan alıb. İlk hissə 2-0 hesabı ilə yekunlaşıb.

54-cü dəqiqədə Kevin De Brüyne özünün 2-ci, komandasının 3-cü qolunu vurub. 86-cı dəqiqədə Rob Holdinq toplardan birinin əvəzini çıxsa da, londonlular bundan artığını bacarmayıblar. Əsas vaxta artırılan dəqiqələrdə isə Erlinq Holand matçda son nöqtəni qoyub. “Mançester Siti” - “Arsenal”: 4-1.

Qələbə sayəsində xallarının sayını 73-ə çatdıran “Siti” 2-ci pillədə olsa da, ehtiyatda daha 2 görüşü var. 4 oyundur qalib gəlməyən və 75 xalı olan “Arsenal” isə hələ ki, çempionata başçılıq edir. İtaliya kubokunda ilk finalçı müəyyənləşib. Mükafatın son sahibi “İnter” “Cuzeppe Meatsa” arenasında “Yuventus”u qəbul edib. Qarşılaşmada yeganə qolu Federiko Dimarko vurub. Tərəflər arasında ilk matç 1-1 hesabı ilə başa çatdığı üçün “neradzurri” iki görüşün yekununda finala yüksəlib.

İspaniya çempionatının lideri “Barselona” 31-ci turu gözlənilməz məğlubiyyətlə tamamlayıb. “Rayo Valyekano”nun qonağı olan kataloniyalılar yerli kollektivdən Alvaro Qarsiya və Fran Qarsiyanın qollarına ancaq bir dəfə cavab veriblər. 2-1 hesabı ilə qalib gələn “Rayo” hazırda 43 xalla 9-cu yerdədir. Son 4 oyunda 3-cü dəfə xal itirən “Barsa” isə ilk pillədəki mövqeyini qoruyur.