Prezidentin dünya çempionu olmuş nəvəsinin məşqçiləri ”Baku TV”yə danışdı

İtaliyanın Peruca şəhərində təşkil edilən turnirdə ölkəmizi layiqincə təmsil edərək dünya çempionu olan Əminə Əliyevanın məşqçiləri Baku TV-yə müsahibə veriblər.

Kunq-Fu Federasiyasının birinci vitse-prezidenti Babək Əliyev Ə.Əliyevanın yarışa çıxmaq qərarını necə verməsindən söz açıb.

“O mənə yarışa çıxmaq istədiyini bildirdikdən sonra respublika çempionatında iştirak etməsi qərarı verildi. Lakin Əminə “orada məni tanıyıb qəsdən uduzacaqlar. Mən isə elə yarış istəmirəm” dedi. Məşqlərimizə davam etdik. Onlara məşq zamanı su içməyi belə qadağan etdim. Bu ciddiyyətin nəticəsi də oldu. İlk dəfə dünya çempionatına çıxan Əminə qalib gəldi”, ‒ deyə Babək Əliyev bildirib.

Kunq-Fu Federasiyasının Prezidenti Nurlan Aslanov isə Ə.Əliyevanın necə əzmlə yarışa hazırlaşmasından danışıb:

“Əminə bir ildən artıq idi ki, Babək Əliyevin nəzarətində fasiləsiz məşq edirdi. Öz çəkilərinin ən güclüləri olan oğlanları onunla döyüşdürməyə başlayanda gördüm ki, Əminə həyəcanı da məğlub etsə, yarışda bu yaşda ondan yaxşı döyüşən olmayacaq”.