“Qalatasaray”ın ulduzu futbolçu karyerasını başa vurur

“Qalatasaray”ın liderlərindən Fernando Muslera mövsümün sonunda futboldan getməyi planlaşdırır.

Türkiyə mediasının yaydığı xəbərə görə, uruqvaylı qapıçı bununla bağlı artıq İstanbul təmsilçisinin rəhbərliyinə və baş məşqçi Okan Buruka məlumat verib. Fernando bu mövsüm yekunlaşdıqdan sonra karyerasını başa vurmaq niyyətindədir.

Qeyd edək ki, 38 yaşlı F.Muslera 2011-ci ildən “sarı-qırmızılar”ın formasını geyinir. İtaliyanın “Latsio” klubundan 7 milyon avroya transfer olunan futbolçu bütün yarışlarda 521 görüşə çıxıb. Bu oyunlarda 555 top buraxan və 186 dəfə qapısını toxunulmaz saxlayan qolkiper Türkiyə superliqasının 7 qat qalibidir. F.Muslera həm də ölkə kubokunda 6, superkubokda isə 4 dəfə qələbəyə sevinib. Bu uğurlar, eləcə də inamlı oyunu ilə “cimbom”un əfsanəsinə çevrilən Fernando uzun illər Uruqvay millisinin də əsas qapıçısı olub. 2009-2022-ci illərdə yığmaya çağırılan futbolçu 133 matçda iştirak edib.