“Qarabağ” Çempionlar liqasında ilk görüşünü keçirdi

“Qarabağ” klubu UEFA Çempionlar liqasının yeni mövsümündə ilk görüşünü keçirib.

“Köhlən atlar” I təsnifat mərhələsinin ilk matçında Cəbəllütariqin “Linkoln” komandasının qonağı olub.

“Viktoriya” stadionunda baş tutan oyunda hesab 25-ci dəqiqədə açılıb. Kike Qomez yerli kollektivi irəli çıxarıb. Fasiləyə tərəflər “qırmızı iblislər”in minimal üstünlüyü ilə yollanıblar.

2-ci hissədə isə Azərbaycan çempionu dönüş etməyi bacarıb. Hücumlarını sürətləndirən Ağdam təmsilçisi 58-ci dəqiqədə Redon Cicanın qolu ilə tarazlığı bərpa edib. 1-1.

Bundan sonra da təzyiqi azaltmayan komandamız əsas vaxta artırılan dəqiqələrdə qələbə qolunu vurub. Bu dəfə Yassin Benzia qapını dəqiq nişan alıb. “Linkoln” – “Qarabağ”: 1-2.

Qeyd edək ki, bu komandalar arasında cavab qarşılaşması iyulun 19-u Bakı Olimpiya Stadionunda keçiriləcək. Bu cütdə qalib gələn tərəf isə növbəti mərhələdə Polşanın “Rakuv” və Estoniyanın “Flora” klubları arasında mübarizənin güclüsü ilə qarşılaşacaq.