“Qarabağ” klubların dünya reytinqində mövqeyini yaxşılaşdırıb

“Qarabağ” komandası dünya klublarının reytinq cədvəlində mövqeyini yaxşılaşdırıb.

Azərbaycan çempionu Beynəlxalq Futbol Tarixi və Statistikaları Federasiyasının tərtib etdiyi siyahıda 64-cü yerdədir.

“Köhlən atlar” bu göstərici ilə MDB klubları arasında ən yüksək mövqedə qərarlaşıb. Ağdam təmsilçisi Ukraynanın “Şaxtyor”, “Dnepr-1” və “Dinamo Kiyev”, Moldovanın “Şerif” və Litvanın “Jalgiris” klublarını geridə qoyub.

Bundan başqa, “Qarabağ” komandası “Çelsi”, “Atletiko” Madrid, “Tottenhem” və “Qalatasaray” kimi dünyaca məşhur kollektivləri qabaqlayıb.

Qeyd edək ki, sözügedən siyahıya Çempionlar liqasının son qalibi “Mançester Siti” başçılıq edir. 2-ci pillədə “Real Madrid”, 3-cü yerdə isə “Flamenqo” komandası mövqe tutub. İlk 10-luğun digər pillələrində “İnter”, “Portu”, “Əl-Əhli”, “Mançester Yunayted”, “Napoli”, “Benfika” və “Palmeyras” klubları qərarlaşıb.