“Qarabağ” klubu 2 futbolçusu ilə yollarını ayırdı

“Qarabağ” klubu Ramil Şeydayev və Filip Ozobiçlə yollarını ayırıb.

Bu barədə Ağdam təmsilçisinin sosial şəbəkə hesabında paylaşım edilib. Postda adıçəkilən futbolçularla müqavilənin başa çatdığı bildirilərək, onlara gələcəkdə uğurlar arzulanıb.

Qeyd edək ki, son günlər mediada Ramil Şeydayevin Tailandın “Buriram Yunayted” komandasına keçəcəyi ilə bağlı xəbərlər paylaşılır. Məlumata əsasən, oyunçu bu kollektivlə 2 illik müqavilə imzalayacaq. Onun məvacibi isə təqribən 1 milyon dollar olacaq.

“Köhlən atlar”ı azad agent statusunda tərk edən digər oyunçu Filip Ozobiçin isə ölkəmizdə qalacağı bildirilir. Millimizin də üzvü olan 32 yaşlı yarımmüdafiəçinin “Zirə” klubu ilə danışıqlar apardığı vurğulanır. Keçidlə bağlı razılıq əldə olunsa, Filip "Zirə" ilə 1 illik sözləşməyə qol çəkəcək. Oyunçunun çıxışından asılı olaraq müqavilənin müddətini daha 1 il uzatmaq mümkün olacaq.