“Qarabağ” klubu Sloveniyada “Olimpiya” kollektivi ilə qarşılaşacaq

“Qarabağ” klubu bu gün avrokuboklarda növbəti görüşünü keçirəcək.

“Köhlən atlar” UEFA Avropa liqasında pley-off mərhələsinin ilk matçı çərçivəsində Sloveniyada “Olimpiya” kollektivi ilə üz-üzə gələcəklər.

Lyublyana şəhərinin “Stojitse” stadionunda baş tutacaq qarşılaşma Bakı vaxtı ilə saat 22:00-da başlayacaq. Görüşü Georgi Kabakovun rəhbərlik etdiyi bolqarıstanlı hakimlər briqadası idarə edəcək.

Qeyd edək ki, artıq Konfrans liqasının qrup mərhələsinə vəsiqəni təmin edən “Qarabağ” klubu “Olimpiya” ilə oyun ərəfəsində yaxşı formadadır. Premyer liqanın son turunda “Araz-Naxçıvan”dan 2-1 hesabı ilə güclü olan komandamız bütün yarışlarda son 4 görüşü qalib tamamlayıb.

“Olimpiya” isə Ağdam təmsilçisi ilə matçdan əvvəl ölkə çempionatında “Alüminiy” kollektivini 5-4 hesabı ilə məğlub edib. Ümumən isə Olimpiya son 6 oyunda 4 dəfə qələbə qazanıb, 2 dəfə isə uduzub.