“Qarabağ” reytinq sıralamasında nəhəng klubları qabaqladı

11 sentyabr 2024 212 baxış

Beynəlxalq Futbol Tarixi və Statistikaları Federasiyası klubların yeni dünya reytinqini açıqlayıb.

Sentyabr ayı üçün olan sıralamada “Qarabağ” komandası 182,75 xalla 52-ci pillədə qərarlaşıb. “Köhlən atlar” bu göstərici ilə “Qalatasaray”, “Mançester Yunayted” və “Napoli” kimi məşhur kollektivləri qabaqlayıb.

Digər təmsilçilərimizdən “Zirə” 91,25 xalla 211-ci, “Sabah” 59 xalla 428-ci, “Neftçi” isə 53,5 xalla 482-ci yerdədir.

Qeyd edək ki, siyahıya 403 xalla Çempionlar liqasının və İspaniya çempionatının qalibi “Real Madrid” başçılıq edir. “Kral klubu” ən yaxın izləyicisi, İngiltərə çempionu “Mançester Siti”ni 35 xal qabaqlayır. Ötən mövsüm Bundesliqanı qazanan “Bayer” və Avropa liqasının finalında leverkuzenliləri məğlub edən “Atalanta” isə 3-cü, 4-cü yerlərdə qərarlaşıblar. İlk 10-luğun digər pillələrində “Barselona”, “Atletiko Madrid”, “Borussiya Dortmund”, “Bavariya”, “İnter” və “Arsenal” kimi məşhur klublar mövqe tutublar.

#Qarabağ FK