“Qarabağ”ın növbəti mərhələdəki rəqibini yaxından tanıyaq

“Qarabağ” UEFA Çempionlar Liqasının II təsnifat mərhələsində İralndiyadan olan rəqibi “Şelburn”u hər iki oyunun nəticəsinə görə 4-0 hesabı ilə yenərək növbəti mərhələyə adlamağı bacardı.

Bu dəfə Azərbaycan çempionu Makedoniyanın “Şkendiya” klubu ilə qarşılaşacaq.

Gəlin “köhlən atlar”ın rəqibini yaxından tanıyaq:

“Şkendiya” Makedoniyanın şimal-qərbində yerləşən Tetovo şəhərini təmsil edir. Klubun təməli 1979-cu ildə alban gənclər tərəfindən qoyulub. Komanda ev oyunlarını 15 000 tamaşaçı tutumuna malik olan Tetovo Şəhər Stadionunda keçirir.

Klubun azarkeşləri əsasən Makedoniyada yaşayan albanlardır. “Şkendiya”nın təməli qoyulanda da məqsəd elə albanların azarkeşlik edə biləcəyi bir klubun ərsəyə gəlməsi olub.

“Şkendiya” Makedoniya çempionatının ən titullu futbol klublarından biridir. Komandanın ləqəbi “qırmızı-qaralar”dır.

“Şkendiya” 4 dəfə ölkə çempionu olub. “Qarabağ”ın rəqibi iki dəfə ölkə kuboku və 1 dəfə Makedoniya superkubokuna yiyələnib. Sözügedən kollektiv UEFA reytinqində 150-ci sıradadır.

Təmsilçimiz “Qarabağ” və “Şkendiya” arasında ilk oyun avqustun 5-i Makedoniyada keçiriləcək. Bakıdakı cavab oyunu isə elə həmin ayın 12-nə təsadüf edəcək.