"Atletiko Madrid”in ulduzu “Barselona”ya keçir

“Atletiko Madrid”in əsas oyunçularından olan və ötən mövsümü icarə əsasında “Çelsi”də keçirən Joao Feliş klubdan ayrılmağa yaxındır.

Xarici KİV-də yayılan məlumata görə, 23 yaşlı vinger karyerasını “Barselona”da davam etdirəcək. İddia edilir ki, Kataloniya təmsilçisi Felişi icarəyə götürmək üçün “Atletiko” ilə razılıq əldə edib.

İspaniya çempionu portuqaliyalı oyunçunun keçidi üçün kluba 10 milyon avro ödəməyi planlaşdırır. Eyni zamanda “Barselona”nın Felişi növbəti mövsümdə 50 milyon avroya transfer edəcəyi bildirilir.

Qeyd edək ki, 2019-cu ildə “Benfica”dan “Atletiko”ya keçən Joao Feliş 131 oyunda 34 qola imza atıb. Madrid klubu ilə ölkə çempionatının da qalibi olan Joao icarə əsasında çıxış etdiyi “Çelsi” klubunda 20 oyunda cəmi 4 dəfə fərqlənib.