"Barselona" 17 yaşlı futbolçunun qolu ilə La Liqada çətin qələbə qazandı

İtaliya çempionatında 9-cu turun mərkəzi matçında “Milan” və “Yuventus” klubları üz-üzə gəliblər.

“Cuzeppe Meatsa” arenasında keçirilən görüş qonaqların 1-0 hesablı qələbəsi ilə yekunlaşıb.

“Qoca Sinyora”nın yeganə qolunu 63-cü dəqiqədə Manuel Lokatelli vurub. Bu nəticədən sonra xallarının sayını 20-yə çatdıran “Yuventus” 3-cü pillədə qərarlaşıb. Ardıcıl 4 qalibiyyətdən sonra uduzan “Milan” isə 21 xalla 2-cidir. Yarış cədvəlinə 22 xalla “İnter” başçılıq edir.

La liqanın 10-cu turunda “Atletik Bilbao”nu qəbul edən “Barselona” növbəti dəfə çətinliklə qələbə qazanıb. Meydan sahiblərinin yeganə qolunu 79-cu dəqiqədə oyuna daxil olduqdan cəmi 1 dəqiqə sonra Mark Qiu vurub. Bununla da, 17 yaşlı Mark “blauqrana”nın heyətində debüt matçında fərqlənən ən gənc futbolçu olub.

“Atletik”ə 1-0 hesabı ilə qalib gəldikdən sonra 24 xalı olan “Barselona” 3-cü yerdədir. Komanda 1-ci, 2-ci yerləri bölüşdürən “Real” və “Jirona”dan 1 xal geri qalır.

Qeyd edək ki, “Barsa” növbəti turda məhz “Real Madrid”lə üz-üzə gələcək. Bu görüş oktyabrın 28-i keçiriləcək.