"Barselona" məşhur futbolçu ilə vidalaşır

“Barselona”nın ulduz futbolçusu İlkay Gündoğan klubdan getməyə hazırlaşır.

33 yaşlı yarımmüdafiəçi sabiq komandası “Mançester Siti”yə qayıtmaq niyyətindədir.

Son xəbərlərə görə, “blauqrana”nın baş məşqçisi Hans-Diter Flik İlkayı əsas heyətdə görmür. Bu səbəbdən “Barsa” rəhbərliyi İ.Gündoğanı kollektivdən göndərməyi planlaşdırır.

Bildirilir ki, İlkayın sabiq klubu “Siti”, eləcə də çalışdırıcı Xosep Quardiola onun dəvətində maraqlıdır. Buna görə də keçidin yay transfer pəncərəsinin sonunadək baş tutması real görünür.

Qeyd edək ki, ötən ilin yayından kataloniyalıların formasını geyinən İlkay bütün yarışlarda 51 görüşə qatılıb. Bu qarşılaşmalarda 5 qol vuran təcrübəli oyunçu həm də 14 məhsuldar ötürməni aktivinə yazdırıb. “Barselona” ilə heç bir mükafat qazanmayan veteran futbolçu “Mançester Siti”də çıxış etdiyi müddətdə İngiltərə çempionatında 5, Liqa kubokunda 4, ölkə kuboku və superkubokda isə 2 dəfə qalib gəlib. Bundan başqa, İ.Gündoğan “şəhərlilər”lə UEFA Çempionlar liqasında qələbə qazanıb.