"Barselona" Robert Levandovskinin əvəzləyicisini tapdı

Cari mövsümdə qeyri-sabit nəticələrlə diqqət çəkən “Barselona” yayda heyətində ciddi dəyişikliklərə gedəcək.

Maliyyə problemləri yaşayan klub yüksək məvacibli bəzi futbolçularla vidalaşacaq.

İspaniya mətbuatında yayılan məlumata görə, bu siyahının ilk pilləsində polşalı ulduz Robert Levandovski qərarlaşıb.

“Blauqrana” illik təqribən 22 milyon avro qazanan forvardı komandadan göndərmək niyyətindədir.

Artıq Roberti əvəzləyəcək hücumçunun adı da məlumdur. Kataloniyalılar “Liverpul”un gənc üzvü Darvin Nunyesə müqavilə təklif etməyi planlaşdırır. Ancaq bu keçidə uruqvaylı futbolçunun transfer qiyməti mane ola bilər. Belə ki, məşhur “Transfermarkt” portalına əsasən, Darvinin dəyəri 70 milyon avrodur.

Qeyd edək ki, 2022-ci ildə 45 milyon avroya “Bavariya”dan cəlb olunan R.Levandovski “Barsa” ilə İspaniya çempionatı və Super Kubokunu qazanıb. 91 görüşdə 57 qol vuran oyunçunun müqaviləsi 2026-cı ilə qədərdir.

“Liverpul”un 2022-ci ildə 85 milyon avroya “Benfika”dan transfer etdiyi Darvin Nunyes isə “qırmızılar”ın forması ilə 94 matçda 33 qolun müəllifidir.