"Bavariya" – "Qalatasaray" oyununda 3 qol

UEFA Çempionlar liqasında qrup mərhələsinin 4-cü turu çərçivəsində “Bavariya” klubu “Qalatasaray”ı qəbul edib.

“Allianz” arenada keçirilən qarşılaşmanın ilk hissəsində qapılar önündə qol şansları yaransa da, hesab açılmayıb. Lakin münhenlilər ikinci yarıda hesabı açmağı bacarıblar. 80-ci dəqiqədə Harri Keyn fərqlənib. Cəmi 6 dəqiqə sonra Keyn dublunu rəsmiləşdirib.

Görüşə əlavə olunan dəqiqələrdə “sarı-qırmızılar” 1 topun əvəzini çıxsalar da, bu, sadəcə təsəlli olub. Qarşılaşma Almaniya komandasının 2-1 hesablı qalibiyyəti ilə yekunlaşıb. Bu nəticədən sonra “Bavariya” kollektivi 1/8 finala vəsiqəni təmin edib.

A qrupunun digər oyununda isə “Kopenhagen” kollektivi “Mançester Yunayted”lə üz-üzə gəlib. Görüş meydan sahiblərinin 4-3 hesablı qələbəsi ilə bitib. Bu nəticələrdən sonra “Bavariya” 12 xalla liderliyini davam etdirir. Aktivində 4 xalı olan “Kopenhagen” və “Qalatasaray” ardıcıl olaraq 2-ci və 3-cü yerləri bölüşdürürlər. “Mançester Yunayted” isə 3 xalla sonuncu yerdədir.

Qeyd edək ki, “Qalatasaray” növbəti turda doğma meydanında “Mançester Yunayted”i qəbul edəcək. “Bavariya” isə Münhendə “Kopenhagen”i sınağa çəkəcək.