"Bayer Leverkuzen" "Qarabağ"a bu mesajı verdi

“Bayer” klubu “Qarabağ” komandası ilə bağlı maraqlı paylaşım edib.

Almaniya təmsilçisinin “X” platformasında “Komandanıza böyük hörmət bəsləyirik. Bizə 4 əla oyun yaşatdınız, amma xahiş edirik, bunu bir daha etməyin!” sözləri yazılan post yerləşdirilib. Paylaşım qısa zamanda sosial şəbəkələrdə gündəm olub.

Qeyd edək ki, “Bayer” və “Qarabağ” arasında Avropa liqasının 1/8 final mərhələsinin cavab matçı leverkuzenlilərin 3-2 hesablı qələbəsi ilə yekunlaşıb. Meydan sahiblərinin heyətində dubl edən Patrik Şiklə yanaşı, Jeremi Frimponq fərqlənib. Komandamızın qolları isə Abdullah Zubir və Juninyonun aktivindədir. Beləliklə, 2 görüşün yekununda 5-4 hesabı ilə qalib gələn “Bayer” 1/4 finala adlayıb.