"Beşiktaş"dan baş məşqçi ilə bağlı son qərar

Cari mövsüm uğursuz çıxışı ilə diqqət çəkən “Beşiktaş” klubu baş məşqçi ilə bağlı yekun qərarını verib.

Türkiyə mətbuatında yayılan məlumata görə, portuqaliyalı çalışdırıcı Fernandu Santuşun klubdan gedəcəyi müzakirə olunsa da, “ağ-qaralar”ın rəhbərliyi 69 yaşlı mütəxəssisi mövsümün sonuna qədər gözləmək qərarına gəlib.

Belə ki, “Beşiktaş” Türkiyə Kubokunu qazanıb, liqanı 3-cü pillədə başa vursa, Santuş yeni mövsümdə də vəzifəsinə davam edə biləcək.

Qeyd edək ki, Fernandu Santuşun İstanbul təmsilçisi ilə müqaviləsi 2025-ci ilin yayına qədərdir. Komanda hazırda Superliqada 46 xalla 4-cü pillədə qərarlaşıb.

Maraq üçün deyək ki, bir neçə gün öncə “Beşiktaş” klubunun “Qarabağ”ın baş məşqçisi Qurban Qurbanovla maraqlandığı ilə bağlı xəbərlər yayılıb. Santuşun komandadan göndəriləcəyi təqdirdə bu posta əsas namizəd Qurban Qurbanovdur. Hətta iddia olunur ki, “ağ-qaralar”ın idman direktoru Samet Aybaba bununla bağlı Qurbanovun özü ilə də əlaqə saxlayıb. O, həmkarından mövsümün sonunda Superliqada işləmək istəyib-istəmədiyini soruşub. Lakin Qurbanovun məsələyə necə yanaşdığı hələ ki məlum deyil.