"Fənərbağça"nın baş məşqçisi Joze Mourinyo milli komandanı çalışdırmağa yaxındır

"Fənarbağça"nın baş məşqçisi Joze Mourinyo Portuqaliya millisinə rəhbərlik etməyə yaxındır.

Son məlumatlara əsasən, futbol üzrə Portuqaliya seçməsinin hazırkı baş məşqçisi ispaniyalı mütəxəssis Roberto Martinezin gedişindən sonra Joze Mourinyo "seleçao"da onu əvəz edəcək.

Portuqaliya Futbol Federasiyası Joze Mourinyonun müqaviləsinə vaxtından əvvəl xitam vermək üçün "Fənərbağça"ya təzminat ödəmək variantını nəzərdən keçirir.

Məlumatda bildirilir ki, federasiyanın 62 yaşlı mütəxəssisi təyin etməkdə məqsədi seçmənin qarşıdakı 2026-cı il dünya çempionatına "maksimum zəmanətlə" yollanmaq istəyidir.

Federasiya Martinezin çalışdırdığı yığmanın UEFA Millətlər Liqasında necə çıxış etməsindən asılı olmayaraq, Mourinyonu Portuqaliya millisinə cəlb edəcək.

Roberto Martinez 2023-cü ilin yanvarından Portuqaliya millisinin baş məşqçisidir. Onun rəhbərliyi altında komanda Avro-2024-ə vəsiqə qazanıb və 1/4 finala yüksəlib. Portuqaliya millisi iyunun 4-də Millətlər Liqasının yarımfinalında Almaniya ilə qarşılaşacaq.